Наслов:
БОГАТА ПОНУДА – ДММ 2015
изминатиот викенд на Деновите на македонската музика
Објавено на: 06.04.2015
Автор: Марко Коловски
Периодика: Македонско радио - Радио Скопје
Програма:
Тежок македонски танец од Коларовски, „Марионети“ од Пандевска, „Аегри Сомниа“ од Димушевски и Книгата на тајните од Андовска; Суита „Рустикана“ од Хрисик и дела од Филип Иванов и Тодор Трајчевски; Дела од Михајло Трендафиловски, Никола Крстевски, Александар Пејовски, Сони Петровски и Дамјан Темков.
Учесници:
Ансамбл за современа музика „Кон темпора“ со гости од германскиот ансамбл „Авентуре“; Мандолинскиот оркестар „Скопје“; диригент: Рамадан Шукри; Битолскиот камерен оркестар; диригент: Жолт Наѓ, Унгарија
Забелешка:
Викендот на годинашниве Денови на македонската музика започна со интересниот концерт во Музејот на град Скопје на кој настапи ансамблот за современа музика „Кон темпора“ со гости од германскиот ансамбал „Авентуре“. Овој концерт привлече големо внимание и, мора да се каже дека ги оправда очекувањата. И во творечка и во изведувачка смисла. Слушнавме седум композиции од кои три синоќа доживеаја македонска праизведба. Сите седум беа различни и дадоа еден интересн спектар на творечките напрегања во последниве дсетина години: од композицијата Тежок македонски танец од македонскиот композитор Гоце Коларовски, напашана две години пред неговата смрт, односно во 2044 година до делата на Ана Пандовска и Кокан Димушевски создадени минатата година како дел од програмата за поттикнување на творештвото од страна на Министерството за култура на Република Македонија.
Како што рековме, делата беа интересни, со разновидни творечки пристапи што произлегуваа од различната естетика на нивните автори. Во тие рамки, и како своевидни антиподи – посебно треба да се истакнат Книгата на тајните од Дарија Андовска, создадена во еден ултрамодерен композиторски јазик, до „Марионети“ од Пандевска и „Аегри Сомниа“ од Димушевски пишувани со еден податилив и неокласичен музички израз. Еве, за миг како звучеше фрагмент од композицијата на Ана Пандевска.
Во саботата имавме можност да слушнеме два концерти. На првиот настапи Мандолинскиот оркестар „Скопје“ под раководство на рамадан Шукри. Изведе дела од девет македонски автори, главно напишани поодамна. Освен двете на младиот Филип Иванов и Тодор Трајчевски кои ја доживеаја својата премиера. Без оглед што се создадени во временски дијапазон од седум децении, тие беа стилски монолитни. Се потпираа на тонален јазик и врз фолклорни теми. Звучеа пристојно, иако камерниот состав на мандолинскиот оркестар понекогаш не беше доволен да ја долови целата замислена звучна маса. А, како звиучеше слушнете преку фрагмент од Суитата „Рустикана“ од Таки Хрисик.Непосредно по овој коонцерт се одржа самостојниот настап на дувачкото трио од ансамблот „Авентуре“ од Германија. Изведе дела од македонски и германски автори. Заедничко на сите беше што беа и стилски и технички сосема слични. Веројатно и заради различните комбинации на триото за кое беа пишувани. За жал, заедничко беше и тоа што речиси сите тие се одликуваа со едноличност која доведуваше до здодевност. Да се пишува за солистички инструменти е навистина тешка задача, особено кога тоа се прави за обоа, кларинет или фагот. И затоа, и покрај извонредната посветеност и мајсторство на гостите од Германија, впечатокот од делата не беше доволно добар. И, што е интересно, и од нашите и од германските автори.
И, конечно, синоќа, го слушнавме Битолскиот камерен оркестар кој под диригентство на Жолт Наѓ од Унгарија вечер пред тоа имаше настап во Битола. Поставувањето на пет премиерни дела на програмата, како што беше овој пат, е крупен залак за кој и да е светски ансамбл. За Битолскиот камерен оркестар, кој што настапува повремено, тоа беше повеќе од тоа и затоа ефектот од нивните изведби беше половичен. Беа изведени дела од Михајло Трендафиловски, Никола Крстевски, Александар Пејовски, Сони Петровски и Дамјан Темков. Сите тие беа ускратени за една подобра премиерна изведба на нивните дела, со што впечатокот за нивниот квалитет ќе можеѓе поточно да се определи. Но, сепак, првиочниот впечаток е дека за некои од нив ниту најдобрата изведба не можеше да промени ништо битно. Иние кои најмногу имаат причини да жаллат, се чини, се Михајло Трендафиловски, Сони Петровски и делумно – Дамјан Темков. Иако, барем Трендафиловски и Темков ја имаа среќата солисти во нивните дела да бидат одличната пијанистка Ана Гацева и младиот виртуоз на саксофон Нинослав Димов.
Вечерва Деновите на македонската музика продолжуваат со традиционалниот концерт посветен на младите композитори на кој ќе бидат изведени делата на оние што треба да бидат иднината на нашата композиторска мисла. Концертот е во Музејот на град Скопје, а влезот слободен.
Клучни зборови:
Оригинален извадок:
за поголем формат