Објавено на: 30.04.2009

Автор: Марко Коловски

Периодика: Македонско радио - Радио Скопје

Програма:
Дела од творештвото на Георг Фридрих Хендл

Учесници:
Македонска филхармонија, Алесандро Д‘Агостини, Марчела Орсати Таламанка, Благој Нацоски, Луиџи Скифано

Забелешка:
Последниот концерт на Македонската филхармонија не беше вообичаен бидејќи беше јубилеен - посветен во чест на одбележувањето на 250 годишнината од смртта на Георг Фридрих Хендл. Со самото тоа беше невообичаен затоа што програмата не беше и не можеше да биде конципирана на конвенционален начин, ами беше обид да се направи своевиден пресек и хронолошки времеполов низ обемниот творечки опус на големиот барокен мајстор. Освен ова, или токму заради ова, тоа беше своевиден оперски концерт - исполнет главно со арии од вокално-инструменталните дела на Хендл, со што беше шанса да видиме три познати вокални уметници: нашиот, сега веќе светски афирмиран тенор Благој Нацоски, заедно со гостите од Италија - сопранистката во голем пејачки подем Марчела Орсати Таламанка и контратенорот Луиџи Скифано. Сите под диригентската палка на нивниот сонародник Алесандро Д`агостини. По речиси двочасовната програма во солидно пополнетата сала на Домот на Армијата на Македонија, публиката со топли аплаузи ги испрати и солистите и диригентот и македонските филхармоничари. Тоа беше знак дека прилично добро ја издржа епски долгата, прилично еднолична и со самото тоа на моменти здодевна програма и дека e задоволна од она што го покажаа учесниците во изведбата. Од нивниот аплауз не можеше да се заклучи, но од изведбите секако - дека задоволството не е подеднакво од сите исполненија, дека, Благој Нацоски со својата култивирана изведба и лирската емоција остави многу посилен впечаток од прилично извештачениот фалсет на Луиџи Скифано, или дека Марчела Орсати Таламанка е сопранистка пред која што стои блескава кариера, иако и она што до сега го постигнала е за секаков респект. Оркестарот, во својата скратена формација соодветна на барањата на партитурите на Хендл, гледано од аспект на вообичаените изведувачки стандардни беше прилично коректен. Она што беше видливо е тоа што тие не успеаја да ја доловат сликата на долгите перики, возвишеноста, галантноста и сјајот на барокните салони што е нераздвојна асоцијација при секое слушање на Хендловата музика. Тоа, всушност значи, дека тие не успеаа стилски да ја доловат суштината на Хендловата музика што е, веројатно, услов без кој и не може да се добие преодна оценка. Дали и колку во сето тоа асистираше сценски енергичниот диригент Алесандро Д`агостини ќе остане тајна. Како и да е, 250 годишнината од смртта на Хендл беше одбележана на начин на кој беше опишан. Можеше и поинаку, на пример со изведба на едно од неговите грандиозни дела, како што е ораториумот „Месија“, но таквата идеја ќе остане како можност за некоја следна пригода.

Клучни зборови:

2009 Марчела Орсати -Таламанка Луиџи Скифано Македонско радио - Радио Скопје Македонскa филхармонија Георг Фридрих Хендл Марко Коловски Благој Нацоски Алесандро Д' Агостини